ඔබ මල්වර වූ දවස මතකද? එසේ නම් ඔයා ගැන කියවෙන මේ දේවල් හරිද කියලා බලන්න

වැඩිවියට පත්වීම යනු කාන්තාවක විසින් ලබන විශේෂ වරප්‍රසාදයකි. එහි අතුරුඵලයක්‌ වශයෙන් විවාහයෙන් පසු මවක වීමේ භාග්‍යය ඇයට උදාවේ. වයස අවුරුදු 09 ත් 15 ත් අතර ගැහැනු දරුවකුගේ ඩිම්භ-කෝෂයෙන් ඩිම්බයක්‌ නිකුත් වී එකී ඩිම්බය පැලෝපීය නාල තුළින් ගර්භාෂය වෙත පැමිණ මසකට පසු ශුද්ධ වීම මල්වර වීම ලෙස සැලකෙයි.

සීත දේශගුණයෙන් යුත් ඇතැම් රටවල කතුන්ට මල්වර වීමට වයස අවුරුදු 18 ක්‌ 20 ක්‌ පමණ ගත වෙයි. ආසියාතික රටවල අයට නම් එසේ නොවේ. වයස අවුරුදු 06 සිට මල්වර වීම සිදුවන අවස්‌ථාද යෙදේ. අපි දැන් බලමු මල්වර වූ දවස අනුව කියවෙන දේවල් මොනවද කියලා.

ඉරිදා මල්වර වූ යුවතිය

මේ දවසේ දිනාධිපති ග්‍රහ ලොව රජු රවි ග්‍රහයාය. ඔබ මල්වර වූයේ ඉරිදා දිනෙක නම් රවි ග්‍රහයාගේ ගති ලක්ෂණ බොහෝ සෙයින්ම ඔබට උරුම වේ. ගෙදර රැජිණ මමයි. කියා ඔබ සිතනවා පමණක් නොව අන් අය පාලනය කිරීමට ද උත්සාම දරයි. උඩඟු ගති, කිසිවකු ගණන් නොගන්නා ස්වරූපයක් ද හිමි වේ. කැපී පෙනෙන්නට ඇඳුමින්, පැළඳුමින් සැරසෙන අතර දීප්තිමත් වර්ණ ප්‍රිය කරයි.

සැපවත් ජීවිතයක් උරුම වේ. සමාජයේ ගරු- නම්බු ලබන්නියකි. රැකියාවේ විධායක මට්ටමේ ‍තනතුරු ලබන්නේය. ඉතා උණුසුම් සිරුරකි. රාගාධිකය. රන් සහ ආකාශ වස්තු, අශ්වයන් යනාදිය නිතර සිහිනෙන් දකී. ඇති – හැනි කම් ලොවට ප්‍රදර්ශනය කිරීමට ඉතා කැමතිය. ආකර්ශණීය සිරුරකය හිමිකම් කියයි. ලොකුම දුබලකම නම් බොරු මාන්නයයි. ආඥාදායක චරිතයකි.

සඳුදා මල්වර වූ යුවතිය

මෙදින දිනාධිපති චන්ද්‍රයාය. සඳුදා මල්වර වූ යුවතියට බොහෝ විට සඳු ‍ගේ බලය උරුම වේ. ඔබ ඉතා කාරුණික තැනැත්තියකි. යහපත් දියණියක්, යහපත් සහෝදරියක්, යහපත් බිරිඳක් සහ යහපත් මවක් යන ගරු පදවි සියල්ල දැරීමේ වාසනාව උරුම වේ. මවු – පිය දෙපාර්ශවයටම වාසනාවන්තය. තැන්පත් ගතිගුණ පිහිටන අතර චාම් – සරල විලාසිතා ප්‍රිය කරන්නියකි.

පිරිසිදු බවට මුල් තැන දෙන නමුත් අලංකාරයට ධනය වැය නොකරයි. ආගමට – දහමට- වැඩිහිටි උපස්ථානයට කැමතිය. නිහඬ – ශාන්ත ජීවිතයක් උරුම වේ. දරු සම්පතින් පොහොසත්ය. ඔබ නිවෙසට සිරිකතකි. සැපවත් විවාහ ජීවිතයකට හිමිකම් කියයි. සතුරෝද ඔබ නිසා මිතුරෝ වෙති. පින්වත් තැනැත්තියකි. ඔබේ ලොකු දුර්වලකම වන්නේ දැන දැනම රැවටීමට ගොදුරුවීම යි.

අඟහරුවාදා මල්වර වූ යුවතිය

කුජ හෙවත් සටන්කාමී අඟහරු මෙදින දිනාධිපතියාය‍ ‍. යම් හෙයකින් කුජ හෝරාවේ මල්වර වූයේ නම් ඔබ වඩාත් පරෙස්සම් විය යුතුය. ඉතා අධික උණුසුම් සිරුරකට හිමිකම් කියයි. ඉකිළි – කිහිළි යනාදියෙහි දහදිය උතුරයි. නිතර නිතර ආහාර ගනී. පිපාසය අධික තැනැත්තියකි. රාගාධික නමුත් පූර්ණ තෘප්තියට පත් වන්නේ කලාතුරකිනි. අසාධාරණය රුස්සන්නේ නැත. කළහයට – ගැටුමට බරය‍. ඇඳුම්- පැළඳුම් එතරම් පිළිවෙළක් නැත. කලබලකාරී නමුත් ක්‍රියා ශූරය. ඉක්මන් ගමන් ඇත්තියකි.

රුධිරය විෂවීමේ රෝගයකට නිතර භාජනය වේ. ජනකේන්ද්‍රිය ආශ්‍රිත රෝගයන්ටද පහසුවෙන් ගොදුරු වේ. ඔබ බොහෝ විට දාස භාර්යාවකි. වැඩ වැඩිකර ගනී. හිතට – ගතට විවේකයක් නැත. නොසරුත් බස් කියන්නියකි. බොහෝ විට වියළි, සිහින් සිරුරකට උරුමකම් කියයි. එහෙත් ඔබ අත්කම් යනාදියට ඉතා දක්ෂය. ගොවැතැන් ලාබ උපයයි. ඔබේ ලොකුම දුබලකම වන්නේ මුළු ලෝකයම ඔබට එරෙහිව කුමන්ත්‍රණ කරන බව සිතීම හා පාලනය කර ගත නොහැකි කෝපයයි.

බදාදා මල්වර වූ යුවතිය

ඔබට ඉතා ඉක්මන් විවාහයක් උරුමය. නොබෝ දිනකින්ම දරු සුරතල් බැලීමේ වාසනාවක් ද උද‍ා වේ. එහෙත් ඔබ ද ළමයෙකු මෙන් ජීවත් වන්නියකි‍. නිතර විනෝදයෙන් සහ කෙළි ලොල්බවින් යුතුව කාලය ගෙවයි. වියපත් වීම සිදුවන්නේ හෙමිහිටය. ගණිතය- විද්‍යාව සහ ලිපි ලේඛණ කටයුතු සඳහා දක්ෂ වේ. ක්‍රමානුකූලව, පිළිවෙළට වැඩ කරන්නියකි. උපාය – ප්‍රයෝග යනාදියෙහි හපන්නියකි. සංගීතය, සාහිත්‍ය කලා, විනෝද කටයුතු තදින් ප්‍රිය කරයි.

රඟපෑම හා අනුකරණ‍යේ දී ඔබ සැබෑම දක්ෂ තැනැත්තියෙකි. නිතර දොඩමළුය. සවන් දීම අඩුය. අනෙකා සතුටට පත් කරවන විනෝදකාමී චරිතයකි. ඔබ සිටි තැන පාළුව පලා යයි. සැපවත් විවාහයක් සහ නීරෝගී දරුවන් උරුම වේ. සමාජයට හිතැති චරිතයකි. ඉතා තියුණු වහා වැටහෙන බුද්ධියක් හිමි වේ‍ . ඔබ සතු ලොකුම දුබලකම වන්නේ, කිසිවක් තනිවම කර කියා ගත නොහැකි වීම සහ වග විභාගයකින් තොරව කතා කිරීමයි. රැස්වීම්වලට ලක්වන හෙයින් පරෙස්සම් වීම මැනවි.

බ්‍රහස්පතින්දා මල්වර වූ යුවතිය

ඔබ මල්වර වූයේ බ්‍රහස්පතින්දා දවසක නම් සැබෑම වාසනාවන්තියකි. මේ දවසේ දිනාධිපති ගුරුය. මනාව වැඩුණු සිරුරක් හිමි වේ. ගෞරවනීය පෙණුමක් උරුමය. කා අතරත් කැපී පෙනේ. සමාජයේ කිත් – පැසසුම් හා උසස් පදවි තානාන්තර දරන්නියෙකි. අධ්‍යාපන කටයුතු ඉතා ඉහළින් සාර්ථක වේ. බහුශ්‍රැත දැනුමකින් පොහොසත්ය. යාන වාහන, ගේ දොර ඉඩ කඩම්, ආදියෙන් අඩුවක් නොවේ. කැපී පෙනෙන ලෙස ශරීරාංග පිහිටයි. මැදිවියට ළඟා වීමත් සමඟම තරමක තරබාරු පෙනුමක් දිස්වේ. නිතඹ සහ කටී ප්‍රදේශය නෙරා යයි. උත්තුංග දේහචාරී පිරිමියෙකුගේ මෙන් ‍තේජස් ගතියක් පළවේ. ආගම – දහමට ඉතා ලැදිය. ගිය ගිය තැන ජනප්‍රියත්වයට පත් වේ.

සමාජයේ නිතැතින්ම නායක තනතුරු දරන්නියක වේ. සැපවත් ජීවන දිවියක් උරුමයි. ඔබ අධික රුධිර පීඩනය, රුධිරගත සීනි, රුධිරගත කොලෙස්ට්‍රෝල් යන රෝග තත්ත්වයන් ගැන දැඩිව අවධායන යොමු කළ යුතුය. එවැනි රෝග පීඩාවන්ට හේතුවන ආහාර පාන යනාදියෙන් හැකිතාක් දුරස්ථව සිටීම ද මැනවි. ඔබ සතු ‍ ලොකුම දුබලකම වන්නේ විවාහ ජීවිතයේ ලෞකික අංශයෙන් ඈත් වන්නට දරන වෑයමයි‍. මෙය ඔබ‍ගේ විවාහ සංස්ථාවේ පැවැත්මට තර්ජණයක් විය හැකිය. පවතින ‍මොහොත තේරුම් ගෙන ජීවත්වීම‍ට හුරුවන්න. ඔබ ඉතා පින්බර යුවතියකි. ගෙදරට සිරිකතකි.

සිකුරාදා මල්වර වූ යුවතිය

මෙදින දිනාධිපති සිකුරුය. ඔබ මෙදින මල්වර වූයේ සිකුරු හෝරාවෙන් නම් රාජ කුමාරිකාවකි. දුගී පැල්පතක උපන්නත් ඔබ ජීවිතයේ බොහෝ සැප සම්පත් ලබන නිදහස්කාමී යුවතියකි. ඔබ අතිශයින්ම විනෝදමත්ය. ශෲගාරාත්මකය. කවි -ගීත – සංගීත – නර්ථන ආදියට ඉමහත් ලෙස ඇලුම් කරයි. ඉතා වෛර්ණ ඇඳුම් ආයිත්තම්, සුවඳ විලවුන්, ආදිය නැතිවම බැරිය. කැපී පෙනෙන්නට මෝස්තර කිරීම ඔබේ විනෝදාශයකි. යාන – වාහන – ගේ දොර ඉඩකඩම් හිමිවන ධනවත් කාන්තාවකි. ඉතා – සැපවත් විවාහයක් උරුමය.

සැමියා සතුටින් තැබීමට නිතර වෙහෙසේ. නිවස සුර විමනක් ලෙස පවත්වා ගැනීමට හපනියකි. වෙළෙඳාම, සෞන්ධර්ය විෂයයන් යනාදියෙන් ලබා ඉපයීමට වාසනාව ඇත. රාගාධික චරිතයකි. නිතර අලුත් අත්දැකීම් සොයා යයි. ජීවිතයේ විවිධත්වය සොයන්නට ගොස් කට කතා ද අසන්නියකි. කෙසේ වෙතත් ඔබ ඉතා වාසනාවන්. යුවතියකි. ඔබ සතු ලොකුම දුබලකම වන්නේ මෝසතර සඳහා සීමාවකින් තොරව මුදල් වැය කිරීමයි‍. අරපිරිමැස්මද ඔබ සතු නොවන ගුණාංගයකි. මේ දුබලකම් නිවැරැදි කර ගතහොත් ඔබ රැජිණක්ලෙස ජීවත් විය හැකිය.

සෙනසුරාදා මල්වර වූ යුවතිය

සෙනසුරාදා, සෙනසුරු හෝරාවෙන් මල්වර වූයේ නම් ඔබ පරෙස්සම් විය යුතුය. ඔබට උරුම වන්නේ ඉතා වෙහෙසකර ජීවිතයකි. විවාහය තරමක් ප්‍රමාද වේ. ලැබෙන සහකරු ඔබට වඩා වැඩිහිටි පෙණුමකින් යුක්ත වේ. දරුපල තරමක් අඩුය. ස්නායු හා වාත රොගවලින් පීඩා විඳින්නට සිදුවිය හැකි නමුත් ඔබ දැරිය කාන්තාවකි. ඕනෑම දුෂ්කර තත්ත්වයක් දරාගෙන පීඩනය මැද ජීවිතය පවත්වාගෙන යෑමේ කලාව දනී. විවාහ ජීවිතය එතරම් කළ එළියක් නැති නමුත් ස්ථීර පවුල් සංස්ථාවකට උරුම කියයි.

ආගමික භුක්තිය ඉහළ තැනැත්තියෙකි. ඉක්මණින් කෝපයට පත් වූවත් ඉක්මණින් ශාන්ත බවට පත්වන චරිතයකි. ලෞකික සැපයට වඩා ලෝකෝත්තර සුවය සොයන්නියකි. මල්වර වූ බවක් වත් පිළිනොගන්නා ඔබ කුඩා වයසේ සිටම වැඩිහිටි ස්වරූපයක් ආරූඪ කර ගනී. අර පරෙස්සමෙන් ජීවිතය පවත්වාගෙන යන තම පවුල වෙනුවෙන්ම දුක් උසුලන දිරිය මවකි. ඔබේ ලොකුම දුබලකම වන්නේ; ශාරීරික සුවතාව සහ පිළිවෙළ ගැන එතරම් නොතැකීමය.

-කේ.සී.ජේ. රත්නායක